Eskalagarritasunerako inbertsioa

Eskalagarritasuna bultzatzeko, deslokalizazioa saihesteko eta tokiko inbertitzaileen sarea indartzeko ETEen eta MIDCAP enpresen birdimensionatzea

KAPITALA, HAZKUNDEA, ETEAK, MIDCAP, EUSKADI ERALDATUZ 2030

Helburua

Enpresetan epe luzera inbertitzea, horien hazkundea eta sendotzea bultzatzeko, lehiakortasuna eta errotzea indartzeko eta tokiko inbertitzaileen sarea sendotzeko.

Eskalagarritasun Programa zeharkako inbertsiorako tresna publiko-pribatua da, Euskadin inbertsio eraldatzaileak sustatzea helburu duena. Programak enpresei laguntzen die hazkunde-fase desberdinetan, Euskadin duten errotzea indartuz eta, aldi berean, ekosistemarekin konprometitutako tokiko inbertitzaileen sarea zabalduta.

Programaren helburua da enpresen tamaina-handitzea eta hazkundea bultzatzea, konpainiek merkatu globalek eskatzen duten eskala, profesionalizazioa eta lehiakortasuna lor ditzaten; enpresa-talde sendoagoak eta eraginkorragoak kontsolidatzea, prozesu, egitura eta gobernantza-eredu hobeen bidez; eta kapital pribatu gehigarria mobilizatzea, inbertsio publikoak lurraldearen garapen ekonomikoan duen eragina biderkatzeko.

Horrela, deialdiaren xedea da Euskal enpresetan hazkunde iraunkorra bultzatzeko gai diren funtsak hautatzea, inbertsio-talentua erakarriko dutenak eta tokiko inbertitzaileen sarea sendotuko dutenak.

Nori zuzendua

Programa honako hauei zuzenduta dago: jada eratuta dauden edo CNMVren baimen-prozesuan dauden arrisku-kapitaleko erakundeei, kapital pribatuaren partaidetza nagusia dutenak (%>50) eta erabakiak hartzeko kontrol pribatu eraginkorra eta autonomia bermatzen dutenak. Programa epe luzerako hazkundera, hedapenera edo enpresa-kontsolidaziora bideratutako inbertsio-tesia duten funts edo AKSei zuzentzen zaie, 50 milioi eurotik gorako ondare objektiboa dutenak. Baliabideen azken xedea EAEko ETEak eta Midcap enpresak finantzatzea izango da, horien hazkundea, profesionalizatzea edo internazionalizazioa sustatzeko.

Eskatzaileek eta bitartekoek bete beharrekoak

Funtsa edo Arrisku-Kapitaleko Sozietatea (AKS) arrisku-kapitaleko erakundean Espainian merkaturatzeko baimena indarrean edo baimen-prozesuan egotea eta kapital pribatuaren partaidetza nagusia izatea.
Arrisku-kapitaleko erakundeak kontrola (boto-gehiengoa kontseiluan edo/eta kontrol operatiboa) akziodun pribatuen eskuetan dagoela kontrol pribatu eraginkorra eta erabakiak hartzeko autonomia egiaztatzea.
Inbertsio-tesia Programaren helburuekin bat etortzea, epe luzerako hedapen-kapitalari edo enpresa sendotzeari lehentasuna emanez.
Ondare objektiboa 50 milioi eurotik gorakoa izatea.
Gutxienez ondare objektiboaren % 20ko konpromiso lotesleak izatea, gehienbat inbertitzaile independenteengandik datozenak.
Kudeaketa-taldearen ekarpen propioa, gutxienez, ibilgailuaren helburuzko tamainaren % 2koa izatea.
EAEren intereseko enpresetan inbertitzea, Oinarri Orokorretan jasotako definizioaren arabera; Euskadin egindako inbertsio osoa gutxienez Programa honen esparruan onartutako inbertsioaren bikoitza izanik.
Sektore ez-hautagarriak baztertzea (adibidez: tabakoa, destilatutako alkohola, jokoa, aseguruak, jarduera kaltegarriak edo giza eskubideak urratzen dituztenak).
Europako araudiaren arabera krisian dauden enpresak baztertzea.

Kudeaketa-taldearen baldintzak

Gutxienez bi kidek 5 urteko esperientzia izatea, gutxienez, arrisku-kapitaleko inbertsioetan
Gutxienez kide batek EAEn inbertsioak egiten eta kudeatzen urtebeteko edo gehiagoko esperientzia egiaztatua izatea.

Horrez gain, Oinarrietan jasotako gainerako betekizun, baldintza eta betebeharrak bete beharko dira, bereziki Inbertsio-Konpromisoaren Gutuna formalizatzeak dakartzanak.

Ebaluazio-irizpideak

Inbertsio-tesia eta balioa sortzeko estrategia: INDARTUZen eta Euskadi Eraldatuz 2030 Planaren helburuekin bat etortzea, balioa sortzeko eredua (digitalizazioa, internazionalizazioa, eraginkortasuna, etab.) eta IGG irizpideen integrazioa.
Kudeaketa-taldearen kalitatea eta track record-a: inbertsio eta desinbertsio konparagarrietan izandako esperientzia, lortutako errentagarritasunen maila eta koherentzia (TIR, MOIC, etab.), eta gobernantza-eredua eta egitura.
Kapitalaren mobilizazioa eta Euskadirekiko errotzea: kapital pribatu gehigarria erakartzeko gaitasuna, errotze-konpromisoa, eta bat-etortze ekonomikoa (komisioak, gutxieneko BETa).

Proposamenak aurkeztea

Interesdunek Oinarri Orokorretan zehaztutakoaren arabera bidali ahal izango dute proposamena edozein unetan; hala ere, ebaluazioa eta onarpena urtean bitan egingo dira, bi ziklo finkotan:

1. zikloa: azaroaren 1etik apirilaren 30era jasotako proposamenak, maiatzaren 1etik ekainaren 30era ebaluatuko dira.
2. zikloa: maiatzaren 1etik urriaren 31ra jasotako proposamenak, azaroaren 1etik abenduaren 31ra ebaluatuko dira.

Programan parte hartzeko beharrezko dokumentazioa Oinarrietan zehaztuta dago.

Proposamenak honako helbide elektronikora bidali ahal izango dira: indartuz@ivf-fei.eus. Helbide horretara bertara bidali ahal izango dira oinarriei eta prozesuari buruzko kontsultak ere. FEIk aldian-aldian argitaratuko ditu jasotako kontsulten erantzunak, prozesuaren gardentasuna eta berdintasuna bermatzeko.