Indartuz

Baldintza nagusiak

• Egoitza fiskala edo ekoizpen-zentroa Euskadin izatea, edo hura bertara lekualdatzeko edo bertan eratzeko konpromisoa hartzea.
• Finantzaketa jaso ahal izango dute, halaber, aurreko baldintza betetzen ez duten eta Euskadin eragin positiboa duen eraldatze-proiektu bat duten enpresek.
• Proiektu eraldatzaile bat izatea, ekonomikoki eta teknikoki bideragarria, Euskadin egin beharrekoa.
• Egunean izatea zerga-betebeharrak eta Gizarte Segurantzarekikoak.
• Onuraduna den pertsona fisiko edo juridiko pribatua "krisian dagoen enpresa" ez izatea.
• Konkurtso-deklaraziorik eskatu ez izana, prozeduraren batean kaudimengabetzat edo konkurtsoan deklaratuta ez egotea, kaudimengabezia kolektiboko prozeduraren batean ez egotea edo, hartzekodunek eskatuz gero, horretarako baldintzak ez betetzea.
• Egoitza fiskala paradisu fiskaltzat hartutako lurralde edo herrialde batean ez izatea.

Zeintzuk dira proiektu hautagarriak?

Eraldatzailetzat hartzen diren proiektuak izango dira hautagarri, hau da, trantsizio hirukoitza (teknologiko-digitala, energetiko-ingurumenekoa edo demografiko-soziala) modu integral edo partzialean lantzen dutenak, eta hazkundea, nazioartekotzea, lehiakortasuna eta berrikuntza sustatzea bultzatzen dutenak. Euskadiko sektore estrategikoak eta Euskadi Eraldatuz 2030ean definitutako jardun-eremu eta -bertikalak lehentasuna izango dute.

Funtsean,

Eraldaketa energetiko-ekologikoa: enpresa-jardueraren ingurumen-inpaktua murriztera, baliabideen erabileraren eraginkortasuna hobetzera, deskarbonizazioan aurrera egitera eta ekonomia zirkularraren printzipioekin lerrokatzera bideratutako aldaketak. Barne:

• Energia-eraginkortasunerako eta energia berriztagarrietarako inbertsioak (energía berriztagarriak sortzea, energia egonkorra biltegiratzea, smart grid-ak, hidrogenoaren ekonomia, sorkuntza banatua, etab.).
• Prozesu kutsatzaileak edo karbono-intentsiboak ordeztea (azpiegitura, garraioa eta biltegiratzearen banaketa hobetzea).
• Lehengaien eta hondakinen kudeaketa iraunkorra.
• Ekonomia zirkularra sustatzea, berrerabilpenean, birziklatzean eta berrikuntzan oinarritutako proiektuekin, produktuen bizitza luzatzeko eta modu iraunkorrean balioa sortzeko.

Eraldaketa teknologiko-digitala: prozesuak, produktuak edo zerbitzuak digitalizatzeko, automatizatzeko, optimizatzeko edo berrasmatzeko aukera emango duten teknologia aurreratuak sartzea. Barne:

• Gaitzeko teknologiak erabiltzea (AA, IoT, blockchain, konputazio kuantikoa, robotika, mikroelektronika, erdieroaleak, etab.).
• Kudeaketa-, ekoizpen- eta merkaturatze-sistema digitalak integratzea (industria-digitalizazioa, automatizazioa, datu-zentroak, etab.).
• Soluzio teknologiko propioak garatzea edo plataforma berriak egokitzea.

Eraldaketa produktibo-industriala: Jarduera produktiboaren birkonfigurazioa, eskala, efizientzia edo dibertsifikazioa irabazteko, balio-katean duen posizioa hobetzeko edo merkatu berrietara sartzeko. Barne:

• Aldaketak ekoizpen- eta antolaketa-prozesuetan (manufaktura aurreratua, 5.0 industria, Smart Factory, etab.).
• Ekoizpen edo birlokalizazio industrialeko lerro berriak ezartzea (automobilgintzan: ibilgailu autonomoak eta konektatuak, etab.).
• Berrinbertsioa, ezagutzan edo teknologian intentsiboagoak diren industrietarantz aurrera egiteko.

Hazkunde-planak: beren dimentsio ekonomikoa, operatiboa edo estrategikoa modu iraunkorrean handitzeko planak dituzten enpresak, merkatuan duten posizioa sendotuz, balio erantsi handiagoa sortuz eta lehiatzeko gaitasuna handituz. Barne:

• Ekoizpen-ahalmena eta ahalmen operatiboa handitzea, ekoizpen-bolumena handitzeko, prozesuak automatizatzeko edo instalazioak hobetzeko ekintzen bidez.
• Produktuak, zerbitzuak edo merkatuak dibertsifikatzea, negozio-segmentu edo -lerro berrietan sartuz, egungo merkatu edo bezeroekiko mendekotasuna murriztuz.
• Hazkunde ez-organikoa eta hedapena, eskuratzeen, bat-egiteen edo aliantza estrategikoen bidez, honetarako aukera ematen dutenean: gaitasun berriak sartzeko, merkatu osagarrietara sartzeko edo lehia-posizionamendua irabazteko.
• Nazioartekotzea, enpresak kanpo-merkatuetan duen presentzia ireki eta sendotzeko prozesu baten bidez.

Finantzaketa-baldintzak

Proiektu eraldatzaileak finantzatuko dira, aukera malguak eta enpresen benetako profilera egokituak eskainiz, bereziki trantsizio digitalerako, jasangarritasunerako, hazkunderako, nazioartekotzeko, lehiakortasunerako eta berrikuntzarako funtsezko sektoreetan.

• Lerroaren muga: gehienez 200 milioi euro, eskariaren eta baliabideen erabilgarritasunaren arabera.
• Tresna: maileguak edo bermeak.
• Zenbatekoa: 1.000.000 € gutxienez. Proiektuaren ezaugarrien eta beharren arabera zehaztuko da.
• Epea: 10 urtera arte, eta gehienez 3 urteko gabealdia. Salbuespen gisa, epe luzeagoak eta amortizazio-baldintza malguagoak aztertu ahal izango dira.
• Interes-mota:  Euriborrari dagokion tasa-aldakorra edo tasa finkoa.
• Bermeak: bermeak eskatu ahalko dira, inbertsio-proiektuaren bideragarritasuna, eskatzailearen kaudimena eta finantzaketaren ezaugarriak kontuan hartuta.

Finantzaketa-lerro hau Euskadi Eraldatuz 2030 inbertsio-planaren barruan kokatzen da, Eusko Jaurlaritzak Euskal Finantza Aliantzarekin duen 1.000 milioi euroko inbertsio-konpromisoa gauzatzeko.

Interesa duten enpresek FEIri aurkeztu beharko diote eskabidea, web-orrian adierazitako ohiko harreman-kanalen bidez. Eskabidea osatu ondoren, dagokion ebaluazioa egingo da, proiektuaren finantza-analisian eta bideragarritasunean oinarrituta.